بۇگىن، 28 ناۋرىزدا الماتى وبلىسىندا ءۇش ادامنان كوروناۆيرۋس تابىلىپ، وبلىستاعى ىندەت جۇقتىرعاندار سانى ءتورت ادامعا جەتتى.  وبلىس اكىمىنىڭ باسپا ءسوز قىزمەتى مالىمەتىنشە، ۆيرۋس تابىلعان ءۇش ادام دا ايەل، بىرەۋىنىڭ اياعى اۋىر. 

"ءبىرىنشىسى – 1957 جىلى تۋعان ايەل. ول ىلە اۋدانىنىنداعى پروۆيزورلىق گوسپيتالدا كارانتيندە جاتقان. كوروناۆيرۋس جۇقتىرعان اداممەن قارىم-قاتىناستا بولعان. ەكىنشىسى – جامبىل اۋدانىنىڭ تۇرعىنى، 1997 جىلى تۋعان ايەل ادام. 20 ناۋرىزدا وڭتۇستىك كورەيانىڭ يە چوۋ قالاسىنان الماتىعا ۇشىپ كەلگەن. ال ءۇشىنشىسى – 1995 جىلى تۋعان قاراساي اۋدانىنىڭ تۇرعىنى. ول جۇكتىلىكتىڭ 21-22 اپتاسىندا. ءقازىر ءۇش ادام دا قاراساي اۋداندىق ينفەكسيالىق اۋرۋحانادا ەم الىپ جاتىر" دەلىنگەن حابارلامادا.

بۇعان دەيىن الماتى وبلىسىندا 34 جاستاعى ەر ادامنان ۆيرۋس تابىلعان بولاتىن. ول ساۋد ارابياسىنان تۇركيا ارقىلى بىشكەككە ۇشىپ كەلگەن. كەيىن تاكسيمەن الماتىعا جەتكەن.